واشنگٹن: (رائیٹ ناوٴ نیوز) وائٹ ہاؤس کی ترجمان کیرولین لیوٹ نے کہا ہے کہ صدر ٹرمپ نے ایران کے ساتھ سیز فائر کے لیے کوئی مخصوص ڈیڈ لائن طے نہیں کی۔

ترجمان نے 3 سے 5 روز کی ڈیڈ لائن کی خبروں کو مسترد کرتے ہوئے کہا کہ وقت کا تعین صدر خود کریں گے۔ انہوں نے مزید کہا کہ ایران کو متفقہ تجویز پیش کرنے کے لیے چند دن دیے گئے ہیں، جس دوران عارضی جنگ بندی برقرار رہ سکتی ہے۔

صدر ٹرمپ آبنائے ہرمز میں ناکہ بندی سے مطمئن ہیں اور ایران پر معاشی دباؤ کے باعث مذاکرات کی جانب واپسی کی توقع ہے۔ ترجمان کا کہنا تھا کہ امریکی صدر ایران کے جواب کے منتظر ہیں۔

وائٹ ہاؤس نے واضح کیا کہ ایران کو لازمی طور پر افزودہ یورینیئم حوالے کرنا ہوگا اور امریکی صدر ہی معاشی ٹائم لائن کا فیصلہ کریں گے۔

واضح رہے کہ ایران کے ساتھ 36 سے 72 گھنٹوں میں مذاکرات کا امکان ہے اور فوج کو ہدایت دی گئی ہے کہ وہ ہر ممکن صورتحال سے نمٹنے کے لیے تیار رہے۔