بیجنگ: (رائیٹ ناوٴ نیوز) چینی دفتر خارجہ کے ترجمان نے ایرانی کارگو جہاز کو قبضے میں لینے پر تشویش کا اظہار کیا ہے۔ انہوں نے پریس بریفنگ میں کہا کہ اس اقدام سے موجودہ صورتحال نازک مرحلے میں داخل ہو گئی ہے۔

ترجمان نے مزید کہا کہ امریکا اور ایران کے درمیان مذاکرات میں چین تعمیری کردار ادا کرنے کا ارادہ رکھتا ہے۔ امید ہے کہ فریقین ذمہ داری کا مظاہرہ کرتے ہوئے جنگ بندی کی پابندی کریں گے۔

امریکی صدر ڈونلڈ ٹرمپ نے اعلان کیا کہ امریکی بحریہ نے ایرانی جہاز کو خلیج عمان میں وارننگ نظر انداز کرنے پر قبضے میں لے لیا ہے۔ یہ جہاز ناکہ بندی توڑنے کے الزام میں روکا گیا تھا۔

امریکی سینٹرل کمانڈ کے مطابق ایرانی پرچم بردار جہاز کو شمالی بحیرہ عرب میں بندرعباس کی طرف جاتے ہوئے روک کر اس کے انجن روم کو نشانہ بنایا گیا۔ اہلکار جہاز پر سوار ہوئے اور اسے تحویل میں لے لیا۔

واضح رہے کہ امریکا اور ایران کے درمیان حالیہ کشیدگی میں یہ واقعہ ایک نئی پیشرفت ہے، جس سے خطے میں تناؤ بڑھنے کا خدشہ ہے۔