کراچی: (رائیٹ ناوٴ نیوز) امیر جماعت اسلامی کراچی، منعم ظفر نے کہا ہے کہ لیاری کو پیرس بنانے کا وعدہ 18 سال سے کیا جا رہا ہے۔

انہوں نے کراچی کے علاقے لیاری آٹھ چوک پر میڈیا سے بات کرتے ہوئے بتایا کہ ناصر حسین شاہ نے لیاری ٹرانسمیشن پروجیکٹ کا اعلان کیا تھا، سڑکیں بنانے، سیوریج کے نظام کی بہتری اور صاف پانی کی فراہمی کے وعدے کیے تھے، مگر پیپلز پارٹی ان وعدوں کو پورا نہیں کر سکی۔

منعم ظفر نے کہا کہ لیاری ٹاؤن پیپلز پارٹی کے زیر انتظام ہے، ہر یونین کونسل کو دو دو کروڑ روپے دیے گئے، مجموعی طور پر 13 یونین کونسلز میں 52 کروڑ روپے کی رقوم دی گئیں۔

انہوں نے مزید کہا کہ گزشتہ تین سالوں میں لیاری میں کوئی قابل ذکر ترقیاتی کام نہیں ہوا۔ لیاری کی عوام کو دھوکا دیا جا رہا ہے۔

واضح رہے کہ لیاری کی عوام کو بہتر سہولیات فراہم کرنے کے وعدے کئی سالوں سے کیے جا رہے ہیں، لیکن عملی اقدامات کا فقدان ہے۔