واشنگٹن: (رائیٹ ناوٴ نیوز)۔ امریکی صدر ڈونلڈ ٹرمپ نے کہا ہے کہ جنگ اور مذاکرات کا مقصد ایران کو ایٹمی ہتھیاروں کے حصول سے روکنا ہے۔ انہوں نے مزید کہا کہ رجیم چینج ہمارے مقاصد میں شامل نہیں تھا، لیکن وہ بھی ہوگئی۔

صدر ٹرمپ نے میڈیا سے گفتگو کرتے ہوئے کہا کہ ایران کو عسکری میدان میں شکست ہوچکی ہے، اس لیے کسی بیک اپ پلان کی ضرورت نہیں ہے۔ ان کے پاس میزائل بہت کم رہ گئے ہیں اور ان کی پیداواری صلاحیت بھی محدود ہوگئی ہے۔ ہماری فوج نے شاندار کام کیا ہے۔

صدر نے مزید کہا کہ جے ڈی وینس اور اسٹیو وٹکوف آج ملاقات کر رہے ہیں۔ معاملہ بڑا ہے، اور میں دیکھوں گا کہ کیا ہوتا ہے۔ ہم خلیج کو کھول رہے ہیں، چاہے دوسرے ممالک ساتھ دیں یا نہ دیں۔

انہوں نے کہا کہ ایران کی نیوی اور ایئر فورس ختم ہوچکی ہیں، اور اینٹی ایئرکرافٹ سسٹم بھی تباہ ہوچکا ہے۔ ان کا لیڈر بھی مارا گیا ہے۔ دیکھتے ہیں کیا ہوتا ہے۔

یاد رہے کہ ایران کی اب تک کی صورتحال میں امریکہ کا کردار اہم رہا ہے اور دونوں ممالک کے درمیان کشیدگی بڑھتی رہی ہے۔