تہران: (رائیٹ ناوٴ نیوز) ایرانی صدر مسعود پزشکیان نے کہا ہے کہ لبنان میں اسرائیلی حملے جنگ بندی معاہدے کی کھلی خلاف ورزی ہیں۔ ان حملوں کے باعث خطے میں امن کی کوششوں کو نقصان پہنچ سکتا ہے۔

ایرانی صدر نے علی خامنہ ای کے چہلم کے موقع پر عوامی اجتماع سے خطاب کرتے ہوئے کہا کہ لبنان پر جاری حملے غیر ذمہ دارانہ ہیں اور یہ جنگ بندی مذاکرات کو بے معنی بنا سکتے ہیں۔ انہوں نے مزید کہا کہ ایران لبنانی عوام کو تنہا نہیں چھوڑے گا۔

مسعود پزشکیان نے کہا کہ یہ حملے دھوکہ دہی کی علامت ہیں اور ظاہر کرتے ہیں کہ بعض فریقین ممکنہ معاہدوں کے لیے سنجیدہ نہیں ہیں۔ انہوں نے زور دیا کہ خطے میں پائیدار امن کے لیے جنگ بندی کی مکمل پاسداری ضروری ہے۔

ترک صدر طیب اردگان نے ایرانی صدر سے ٹیلیفونک رابطہ کرتے ہوئے کہا کہ پاکستان میں ہونے والے امریکا اور ایران کے مذاکرات کو خطے میں دیرپا امن کے قیام کے لیے مؤثر طریقے سے استعمال کیا جانا چاہیے۔

واضح رہے کہ ایران، ترکی اور دیگر علاقائی ممالک کے بیانات مشرق وسطیٰ میں کشیدگی کم کرنے کے لیے سفارتی کوششوں کی نشاندہی کرتے ہیں، تاہم زمینی صورتحال اب بھی پیچیدہ ہے۔