واشنگٹن: (رائیٹ ناوٴ نیوز) امریکی میڈیا نے دعویٰ کیا ہے کہ امریکا اور ایران کے درمیان 45 روزہ جنگ بندی کی شرائط پر مذاکرات جاری ہیں۔ اس میں علاقائی ثالثوں کا ایک گروپ بھی شامل ہے۔

ذرائع کے مطابق یہ مذاکرات جنگ کے مستقل خاتمے کی ممکنہ بنیاد بن سکتے ہیں۔ تاہم، اگلے 48 گھنٹوں میں کسی معاہدے تک پہنچنے کے امکانات کم ہیں۔ یہ کوشش جنگ میں اضافے کو روکنے کا واحد موقع قرار دی جارہی ہے۔

ثالثی کی کوششوں کے تحت، 2 مرحلوں پر مشتمل ڈیل پر غور کیا جا رہا ہے۔ پہلے مرحلے میں 45 روزہ جنگ بندی ہوگی، جس دوران مستقل امن پر بات چیت ہوگی۔

دوسرے مرحلے میں جنگ کے خاتمے پر معاہدہ متوقع ہے۔ اگر مذاکرات کے لیے مزید وقت درکار ہو تو جنگ بندی میں توسیع کی جا سکتی ہے۔ وائٹ ہاؤس اور امریکی محکمہ خارجہ نے اس رپورٹ پر کوئی تبصرہ نہیں کیا۔

واضح رہے کہ موجودہ جنگ کے دوران پاکستان نے امریکا اور ایران کے درمیان ثالثی کا کردار ادا کیا ہے جبکہ بھارت مشرق وسطیٰ سے باہر رہا ہے۔