تہران: (رائیٹ ناوٴ نیوز) ایران کے خلاف امریکا اور اسرائیل کی جارحیت جاری ہے۔ خوزستان میں ایرانی اسٹیل پلانٹ پر بمباری کے بعد پیدوار رک گئی۔ تہران کی یونیورسٹی آف سائنس اینڈ ٹیکنالوجی اور بوشہر میں ایٹمی پاور پلانٹ کے قریب بھی حملے ہوئے۔

واشنگٹن پوسٹ کے مطابق 3 دہائیوں بعد لینڈ مائنز کے استعمال کا انکشاف ہوا ہے۔ شیراز کے مضافات میں متعدد مقامات پر لینڈ مائنز پائی گئیں۔ ایرانی حکام کا کہنا ہے کہ امریکی فوج نے فضا سے لینڈ مائنز گرائیں۔

لینڈ مائنز کے استعمال پر پابندی ہے کیونکہ یہ عام شہریوں کے لیے خطرہ بن سکتی ہیں۔ آخری بار 1991 کی عراق جنگ میں امریکی فوج نے انہیں استعمال کیا تھا۔

ایران نے جوابی کارروائی میں تل ابیب اور امریکی تنصیبات پر میزائل داغے۔ ایرانی فوج کے مطابق دبئی میں امریکی فوج کے ٹھکانوں کو نشانہ بنایا گیا۔ یوکرین کے ایئر ڈیفنس ڈپو کو بھی تباہ کیا گیا۔

واضح رہے کہ ابوظبی میں میزائل کا ملبہ گرنے سے ایک پاکستانی اور پانچ بھارتی شہری زخمی ہوئے۔ سعودی عرب میں پرنس سلطان ایئربیس پر حملے میں 12 امریکی فوجی زخمی ہوئے۔ دیگر مقامات پر بھی نقصانات ہوئے۔