اسلام آباد: (رائیٹ ناوٴ نیوز) عالمی مالیاتی فنڈ کی جانب سے گورننس کی خامیوں اور کرپشن کی نشاندہی کے بعد حکومت نے 142 نکاتی گورننس امپورومنٹ ایکشن پلان کا اعلان کیا۔ یہ پلان وزیراعظم شہباز شریف کے اکنامک گورننس اصلاحات کا حصہ ہے، جس میں کرپشن سے قومی خطرات کی تشخیص اور نیب سمیت اہم اداروں میں تقرریاں شامل ہیں۔

وزیراعظم شہباز شریف نے ایجنڈے کی لانچنگ تقریب میں کہا کہ یہ اصلاحات عالمی اداروں کی سفارشات پر مبنی ہیں۔ ان کے گورننس پلان کے تحت 59 ترجیحی اور 83 تکمیلی اقدامات شامل ہیں، جو آئندہ تین سالوں میں لاگو کیے جائیں گے۔

وزیر خزانہ محمد اورنگزیب نے کہا کہ گورننس پلان تین بنیادی اسٹریمز پر مبنی ہے، جن میں مالیاتی اور عوامی سرمایہ کاری کی حکمرانی، مارکیٹ کے اعتماد میں اضافہ، اور قانونی عمل میں اعتماد پیدا کرنا شامل ہیں۔ وزارت خزانہ اس پلان پر عمل درآمد کے لیے سیکرٹریٹ کے طور پر کام کرے گی۔

حکومت نے اینٹی منی لانڈرنگ ایکٹ کا جائزہ لینے اور اسے پارلیمنٹ میں پیش کرنے کا بھی اعلان کیا ہے، جبکہ جون 2027 تک ترامیم کو مطلع کیا جائے گا۔ اسی دوران پاکستان کی معیشت میں بہتری کے اشارے بھی ظاہر ہو رہے ہیں، جن میں جی ڈی پی میں 3.71 فیصد اضافہ شامل ہے۔