ڈی آئی خان: (رائیٹ ناوٴ نیوز)

پاکستان تحریک انصاف (پی ٹی آئی) کے رہنما اور سابق وزیراعلیٰ خیبرپختونخوا علی امین گنڈاپور نے گورنر پنجاب سے ملاقات پر افواہوں کو بلاجواز پروپیگنڈا قرار دیتے ہوئے کہا ہے کہ وہ کسی سے نہیں ڈرتے، اگر کہیں جائیں گے تو خود بتائیں گے۔

ڈیرہ میں میڈیا سے گفتگو کرتے ہوئے علی امین گنڈاپور نے کہا کہ پی ٹی آئی کے خلاف فسطائیت کا سلسلہ جاری ہے اور عمران خان کو ناحق قید میں رکھا گیا ہے۔ انہوں نے کہا کہ عمران خان کو انصاف نہیں مل رہا اور آئین و قانون کا مذاق بنایا جا رہا ہے۔

ان کا کہنا تھا کہ اگر فیملی ملاقات طے ہے تو عمران خان سے ملاقات کرائی جائے۔ سہیل آفریدی ان کا بھائی ہے اور اب وہ وزیراعلیٰ ہے، ان کے دور کے تمام منصوبے آج بھی جاری ہیں۔

علی امین گنڈاپور نے کہا کہ وہ تحریک انصاف کے ساتھ رہیں گے اور کسی سے نہیں ڈرتے، اگر کہیں جائیں گے تو خود بتائیں گے۔ انہوں نے یوسف رضا گیلانی اور گورنر پنجاب سے ملاقات پر پروپیگنڈا کو بلاجواز قرار دیتے ہوئے کہا کہ عوام کی خدمت پر توجہ دی جائے۔