واشنگٹن: (رائیٹ ناوٴ نیوز) امریکی صدر ڈونلڈ ٹرمپ نے پاکستانی قیادت کی تعریف کرتے ہوئے وزیر اعظم شہباز شریف اور فیلڈ مارشل عاصم منیر کو شاندار شخصیات قرار دیا ہے۔ انہوں نے دعویٰ کیا کہ امریکا نے اسرائیل کو لبنان پر مزید بمباری سے روک دیا ہے اور ایران سے متعلق معاہدے کے بیشتر نکات طے پا چکے ہیں۔

صدر ٹرمپ نے سوشل میڈیا پر سعودی عرب، قطر، متحدہ عرب امارات اور پاکستان کا شکریہ ادا کیا۔ ان کا کہنا تھا کہ آبنائے ہرمز آمد و رفت کے لیے کھلی ہے، تاہم ایران سے متعلق ناکہ بندی اس وقت تک برقرار رہے گی جب تک مجوزہ معاہدہ مکمل نہیں ہو جاتا۔

امریکی صدر نے کہا کہ امریکا ایران کا ایٹمی مواد اپنے قبضے میں لے گا اور اس کے بدلے کسی قسم کی رقم نہیں دی جائے گی۔ انہوں نے یہ بھی دعویٰ کیا کہ ایران امریکی مدد سے سمندری بارودی سرنگیں ہٹا رہا ہے اور یہ عمل جزوی طور پر شروع ہو چکا ہے۔

ٹرمپ نے اپنے ایک اور بیان میں آبنائے ہرمز کو ‘آبنائے ایران’ قرار دے کر نئی بحث چھیڑ دی۔ اس بیان کے بعد سفارتی اور سیاسی حلقوں میں ردعمل سامنے آیا، کیونکہ یہ آبی گزرگاہ عالمی توانائی رسد کے لیے انتہائی اہم سمجھی جاتی ہے۔

واضح رہے کہ صدر ٹرمپ کے حالیہ بیانات میں ایران، لبنان، اسرائیل اور آبنائے ہرمز سے متعلق کئی بڑے دعوے سامنے آئے ہیں، لیکن ان میں سے متعدد نکات پر متعلقہ فریقوں کی جانب سے باضابطہ تصدیق یا مختلف مؤقف بھی موجود ہیں۔