کراچی: (رائیٹ ناوٴ نیوز) وزیر اعلیٰ سندھ مراد علی شاہ نے پبلک ٹرانسپورٹ کے لیے بسیں خریدنے اور عوامی آگاہی کے لیے دستاویزی فلموں کے لیے مجموعی طور پر تقریباً دو ارب روپے کی منظوری دی۔

کابینہ اجلاس میں وزیر بلدیات ناصر حسین شاہ نے خزانہ کمیٹی کی سفارشات پیش کیں جبکہ کابینہ نے ان کی منظوری دی۔ کھیلوں کے فروغ کے لیے 56 ملین روپے اسکواش چیمپیئن شپ اور 50 ملین روپے ویٹرن کرکٹ ایسوسی ایشن کو دیے گئے۔

کابینہ نے اسلام کوٹ میں یتیم خانہ کے قیام اور شکارپور میں کالج کے لیے بھی فنڈز مختص کیے ہیں۔ مزید برآں، ملیر میں واٹر سپلائی اور کورنگی میں قبرستان و پارک کے منصوبوں کی بھی منظوری دی گئی۔

وزیراعلیٰ سندھ نے ادب فیسٹیول اور فاطمہ جناح گرلز اسکول کے لیے بھی فنڈز منظور کیے۔ سندھ اسمبلی میں ریجنل کانفرنس کے انعقاد کے لیے 200 ملین روپے مختص کیے گئے۔

کابینہ نے انٹرنل آڈٹ فریم ورک کی منظوری دی تاکہ مالی نظم و ضبط اور شفافیت کو بڑھایا جا سکے۔ پی پی پی منصوبوں کے سیلز ٹیکس استثنا پر غور کیا گیا۔