نیپال میں تباہ کن سیلاب کے بعد 6 سالہ بچی کو تین دن بعد ملبے سے زندہ نکالا گیا، متاثرہ علاقہ تیمورے میں امدادی سرگرمیاں جاری ہیں۔
نیپال: (رائیٹ ناؤ نیوز) نیپال میں تباہ کن سیلاب کے بعد 6 سالہ بچی کو تین دن بعد ملبے سے زندہ نکال لیا گیا ہے۔ یہ واقعہ ضلع رسووا کے گاؤں تیمورے میں پیش آیا جہاں بھوٹے کوشی دریا میں طغیانی کے باعث سیلاب آیا۔
غیرملکی میڈیا کےمطابق تیمورے گاؤں بری طرح متاثر ہوا ہے اور امدادی کارکن زندہ بچ جانے والوں کی تلاش میں مصروف ہیں۔ سیلاب سے متاثرہ علاقوں میں امدادی سرگرمیاں جاری ہیں اور مزید لوگوں کی تلاش کی جا رہی ہے۔
تلاش کے دوران آرمڈ پولیس فورس کے اہلکاروں نے ملبے کے نیچے سے بچی کے رونے کی مدھم آواز سنی۔ فوری کھدائی کے بعد کئی گھنٹوں کی کوششوں سے بچی کو بحفاظت نکال لیا گیا۔
یہ بچی تقریباً 60 گھنٹوں بعد زندہ نکالی گئی ہے، جس سے امدادی کارکنوں کی کوششوں کو تقویت ملی ہے۔ اس کامیابی سے امدادی ٹیموں کی حوصلہ افزائی ہوئی ہے اور مزید بچاؤ اقدامات جاری ہیں۔
واضح رہے کہ تباہ کن سیلاب کی وجہ سے نیپال کے کئی علاقے شدید متاثر ہوئے ہیں اور امدادی ٹیمیں دن رات کوششوں میں مصروف ہیں۔
