واشنگٹن: (رائیٹ ناؤنیوز) امریکی صدر ڈونلڈ ٹرمپ نے ایران کی جوہری تنصیبات کو نشانہ بنانے کی دھمکی دی ہے۔ انہوں نے کہا کہ امریکا ایران کے ‘پک ایکس ماؤنٹین’ کو جلد نشانہ بنا سکتا ہے۔

وائٹ ہاؤس میں صحافیوں سے گفتگو کرتے ہوئے صدر ٹرمپ نے ایران کے اس مقام پر جوہری سرگرمیاں جاری رہنے کی صورت میں کارروائی کا عندیہ دیا۔ ‘پک ایکس ماؤنٹین’ ایران کے نطنز جوہری مرکز کے قریب واقع ایک محفوظ مقام سمجھا جاتا ہے۔

رپورٹس کے مطابق ‘پک ایکس ماؤنٹین’ زیرِ زمین سرنگوں کے کمپلیکس پر مشتمل ہے، جسے ایران کے حساس جوہری پروگرام کا اہم حصہ تصور کیا جاتا ہے۔ صدر ٹرمپ نے کارروائی کے وقت یا طریقہ کار کی تفصیلات نہیں دیں۔

واضح رہے کہ صدر ٹرمپ نے روس اور یوکرین جنگ کے خاتمے کے لیے سفارتی کوششیں تیز کرنے کا بھی اعلان کیا ہے۔ امریکی خصوصی ایلچی اسٹیو وٹکوف اور جیرڈ کشنر جلد روس اور یوکرین کا دورہ کریں گے۔

یاد رہے کہ امریکی صدر کی ایران کے خلاف ممکنہ کارروائی اور روس، یوکرین امن کوششیں امریکا کی دو اہم خارجہ پالیسیوں پر توجہ مرکوز کر رہی ہیں۔