نیویارک: (رائیٹ ناؤ نیوز) یوٹیوب نے اپنے کنٹینٹ کری ایٹرز کو نیٹ فلکس پر جانے سے روکنے کے لیے مالی پیکیج کی پیشکش کی ہے۔ یہ اقدام ڈیجیٹل ویڈیو پلیٹ فارمز کے درمیان بڑھتی ہوئی مسابقت کے پیش نظر کیا گیا ہے۔

بلومبرگ کی رپورٹ کے مطابق یوٹیوب اپنے کری ایٹرز کو دو طریقوں سے ادائیگی کرنے کی منصوبہ بندی کر رہا ہے۔ اس میں مخصوص پروگراموں کی براہِ راست فنڈنگ اور تجارتی شراکت داریوں سے حاصل ریونیو شامل ہے۔

یوٹیوب کے اعلیٰ حکام نے کری ایٹرز کو خبردار کیا ہے کہ نیٹ فلکس پر مواد پیش کرنے والے افراد کو مارکیٹنگ مہمات سے الگ کر دیا جائے گا۔ یہ اقدام کنٹینٹ کری ایٹرز کو پلیٹ فارم تک محدود رکھنے کے لیے کیا جا رہا ہے۔

یہ پیشکش یوٹیوب کی جانب سے اپنے وسیع ناظرین کے طبقے کو برقرار رکھنے کی کوشش ہے۔ مالیاتی اعداد و شمار کے مطابق یوٹیوب کی آمدنی 60 ارب ڈالرز سے تجاوز کر چکی ہے، جو نیٹ فلکس سے زیادہ ہے۔

واضح رہے کہ نیٹ فلکس نے بھی یوٹیوب کے مشہور مواد جیسے ‘کوکومیلن’ کے لائسنس حاصل کیے ہیں۔ اس سے دونوں اداروں کے درمیان مواد کی بالادستی کے لیے نئی معاشی جنگ شروع ہو گئی ہے۔