ایئر انڈیا کی پرواز AI-2379 کی اچانک 300 فٹ نیچے گرنے سے 20 مسافر اور 4 عملے کے ارکان زخمی ہوئے۔ پائلٹ کے ڈرگ ٹیسٹ میں چرس کے استعمال کی تصدیق ہوئی ہے۔
نئی دہلی: (رائیٹ ناؤنیوز) بھارتی ائیر لائن کی پرواز اچانک 300 فٹ نیچے چلی گئی، جس سے مسافر و عملے کے ارکان زخمی ہوئے۔ ایئر انڈیا کی پرواز AI-2379 کے دوران یہ واقعہ پیش آیا، جس کی تحقیقات میں پائلٹ اور تکنیکی نظام دونوں زیر غور ہیں۔
پائلٹ کے ڈرگ ٹیسٹ میں ناکامی کے بعد، ان کے چرس کے استعمال کی تصدیق ہوئی ہے، تاہم تحقیقات میں اس کے واقعے سے تعلق کا تعین نہیں ہوا۔ واقعے کے وقت طیارہ 137 مسافروں اور 8 رکنی عملے کے ساتھ پرواز کر رہا تھا۔ 20 مسافر اور عملے کے 4 ارکان زخمی ہوئے۔
ایئر انڈیا کی رپورٹ کے مطابق، کپتان اپنی نشست پر موجود نہیں تھے جب اسٹال وارننگ فعال ہوئی، اور طیارے کا اگلا حصہ اوپر اٹھ گیا۔ فرسٹ آفیسر نے طیارے کی ناک نیچے کی، جس سے شدید منفی جی فورس پیدا ہوئی۔
تفتیش کار طیارے کے ہائیڈرولک سسٹمز میں خرابی کے شواہد بھی جانچ رہے ہیں۔ گرین، بلیو، اور یلو سسٹمز سے متعلق وارننگز کا جائزہ لیا جا رہا ہے۔ پچ کنٹرول سے متعلق بھی سوالات اٹھ رہے ہیں۔
واضح رہے کہ بھارتی ایئرکرافٹ ایکسیڈنٹ انویسٹی گیشن بیورو تحقیقات کر رہا ہے۔ ایئربس اور فرانس کے BEA کے ماہرین بھی معاونت کر رہے ہیں۔ DGCA نے واقعے کو سنگین قرار دیا ہے۔
