اسلام آباد: (رائیٹ ناؤ نیوز) وفاقی وزیر منصوبہ بندی احسن اقبال نے کہا ہے کہ ملک کے معاشی اشاریے بہتر ہو رہے ہیں، لیکن سوشل اشاریے میں بہتری کے لیے نچلی سطح تک اختیارات کی منتقلی ضروری ہے۔ انہوں نے ‘اڑان پاکستان’ پروگرام کے تحت 10 لاکھ نوجوانوں کو سوشل موبلائزر بنانے کا اعلان کیا ہے۔

احسن اقبال نے اسلام آباد میں پالیسی ڈائیلاگ سیمینار میں خطاب کرتے ہوئے کہا کہ صوبوں نے منتقل شدہ محکموں کے اختیارات نچلی سطح تک نہیں پہنچائے ہیں، جس کی وجہ سے انتظامی ڈھانچوں کی کارکردگی متاثر ہو رہی ہے۔

انہوں نے کہا کہ ملک میں شوگر اور ہیپاٹائٹس تیزی سے پھیل رہے ہیں، جبکہ 40 فیصد بچے غذائی قلت کا شکار ہیں۔ ‘اڑان پاکستان’ کے تحت 10 لاکھ نوجوانوں کو معاشرتی بہتری کے لیے سوشل موبلائزر بنایا جا رہا ہے۔

وفاقی وزیر نے کہا کہ پاکستان، سعودی عرب اور ترکیہ کے تاریخی دفاعی معاہدے نے عالمی سطح پر پاکستان کی حیثیت کو بلند کیا ہے۔ اب ملک کو ترقی کی راہ پر گامزن کرنے کے لیے تمام تر توانائیاں معرکۂ معیشت پر مرکوز کرنا ضروری ہے۔

واضح رہے کہ ‘اڑان پاکستان’ پروگرام کا مقصد ملک کے نوجوانوں کو معاشرتی بہتری کے لیے تیار کرنا ہے، تاکہ وہ معاشرتی مسائل کو حل کرنے میں مؤثر کردار ادا کر سکیں۔