اسلام آباد: (رائیٹ ناؤ نیوز) نیشنل ہائی ویز اینڈ موٹروے پولیس نے اسلام آباد اور راولپنڈی میں 13 اور 14 اگست کو ہیوی ٹریفک کے داخلے پر پابندی عائد کر دی ہے۔ یہ اقدام جشنِ آزادی کے موقع پر ٹریفک کی روانی برقرار رکھنے کے لیے کیا گیا ہے۔

موٹروے پولیس کے ترجمان نے بتایا ہے کہ پابندی 13 اگست رات 12 بجے سے 14 اگست رات 12 بجے تک نافذ رہے گی۔ اس دوران بھاری گاڑیوں کا داخلہ ممنوع ہوگا تاکہ شہریوں کو بہتر سفری سہولت مل سکے۔

شہریوں اور ٹرانسپورٹرز سے اپیل کی گئی ہے کہ وہ اپنے سفری منصوبے پابندی کے اوقات کو مدنظر رکھتے ہوئے ترتیب دیں۔ مقررہ اوقات میں ہیوی ٹریفک کو جڑواں شہروں کی حدود میں لانے سے گریز کریں۔

حکام نے واضح کیا ہے کہ جشنِ آزادی کے موقع پر ٹریفک دباؤ کو کم کرنے کے لیے خصوصی انتظامات کیے جا رہے ہیں۔ شہریوں سے ٹریفک قوانین کی پابندی کی اپیل کی گئی ہے۔

واضح رہے کہ جشنِ آزادی کے موقع پر اسلام آباد کے مختلف ٹریلز بھی 13 اگست کو بند رہیں گے۔ ضلعی انتظامیہ نے شہریوں کو ان دنوں ٹریلز کا رخ نہ کرنے کی ہدایت دی ہے۔