لاہور: (رائیٹ ناؤنیوز) لاہور ہائیکورٹ نے پاکستان تحریک انصاف کی مینارِ پاکستان پر جلسے کی درخواست مسترد کر دی ہے۔ فیصلے میں کہا گیا کہ جلسے کی اجازت نہ دینا آئین کے آرٹیکل 16 کی خلاف ورزی نہیں ہے۔

درخواست گزار میاں عثمان اکرم نے مؤقف اختیار کیا تھا کہ شہریوں کو پُرامن اجتماع کا حق حاصل ہے، جو کہ آئینی آرٹیکل 16 کے تحت محفوظ ہے۔ عدالت نے واضح کیا کہ ڈپٹی کمشنر این او سی جاری کرنے کا مجاز ہے۔

سرکاری وکیل نے بتایا کہ ڈپٹی کمشنر کی زیرِ صدارت اجلاس میں امن و امان کی صورتِ حال کے پیش نظر جلسے کی اجازت نہیں دی گئی۔

عدالت نے مزید کہا کہ مینارِ پاکستان ایک عوامی مقام ہے، جہاں شہری سیر و تفریح کے لیے آتے ہیں، جس کے پیش نظر فیصلے کو برقرار رکھا گیا۔

یاد رہے کہ 3 اگست کو ڈپٹی کمشنر نے جلسے کی اجازت سے متعلق درخواست خارج کر دی تھی، جس پر عدالت نے اپنا فیصلہ سنایا۔