کراچی: (رائیٹ ناؤ نیوز) نیشنل الیکٹرک پاور ریگولیٹری اتھارٹی (نیپرا) نے 25 کلوواٹ تک کے سولر سسٹمز کی منظوری کا طریقہ کار آسان بنا دیا ہے۔ نیپرا نے نیا نوٹیفکیشن جاری کیا ہے جس کے تحت اب 25 کلوواٹ تک کے سولر سسٹمز کے لیے نیپرا سے براہ راست اجازت کی ضرورت نہیں ہوگی۔

اب متعلقہ بجلی تقسیم کار کمپنیاں خود ان سسٹمز کی منظوری دینے کی مجاز ہوں گی، جو پہلے نیپرا کی اجازت کے بغیر ممکن نہیں تھا۔ یہ فیصلہ سولر ریگولیشنز 2026 میں ترمیم کے بعد کیا گیا ہے۔

نیپرا کا کہنا ہے کہ اس اقدام سے سولر سسٹم کی تنصیب کے عمل کو مزید سہل بنایا جائے گا اور صارفین کو اضافی سہولت فراہم کی جائے گی۔ اس سے سولر انرجی کی طرف رجحان بھی بڑھنے کی امید ہے۔

واضح رہے کہ پاکستان میں سولر انرجی کا استعمال بڑھتا جا رہا ہے اور حکومت اس کو مزید عام کرنے کے لیے اقدامات کر رہی ہے۔

یاد رہے کہ اس سے قبل صارفین کو سولر سسٹمز کی منظوری کے لیے پیچیدہ طریقہ کار سے گزرنا پڑتا تھا، جس میں وقت اور پیسہ دونوں کا ضیاع ہوتا تھا۔