اسلام آباد: (رائیٹ ناؤ نیوز) وزیراعظم شہباز شریف نے 100 نوجوان زرعی گریجویٹس کو اٹلی بھیجنے کا اعلان کیا ہے۔ ان کا کہنا تھا کہ یہ نوجوان زیتون کی کاشت اور پروسیسنگ میں جدید تربیت حاصل کریں گے۔ اس اقدام کا مقصد نوجوانوں کو جدید مارکیٹنگ اور ویلیو چین کے شعبوں میں مہارت دینا ہے۔

وزیراعظم نے پاکستان نیشنل اولیو ویلیو چین پالیسی کی تقریب سے خطاب کرتے ہوئے زیتون کے کسانوں، محققین اور برآمد کنندگان کو سراہا۔ انہوں نے کہا کہ زیتون کی کاشت میں صوبائی حکومتوں کا تعاون قابل تعریف ہے اور 60 ہزار ایکڑ پر زیتون کی کاشت کی جارہی ہے۔

شہباز شریف نے کہا کہ پاکستان اور اٹلی زراعت اور ٹریکٹر مینوفیکچرنگ میں تعاون کر رہے ہیں۔ انہوں نے مزید کہا کہ زیتون کی پیداوار اور ویلیو ایڈیشن میں مزید تعاون بڑھایا جائے گا۔

یہ اقدام اس لئے اہم ہے کہ پاکستان ہر سال 4 ارب ڈالر کا خوردنی تیل درآمد کرتا ہے۔ زیتون کی کاشت سے خوردنی تیل کی درآمد میں کمی کا امکان ہے، جس سے ملکی معیشت کو فائدہ ہوگا۔

یاد رہے کہ پاکستان میں زیتون کی کاشت کو فروغ دینے کے لئے صوبائی حکومتیں بھی فعال کردار ادا کر رہی ہیں۔ وفاقی حکومت نے پام آئل اور سورج مکھی کی کاشت کو بھی فروغ دینے کا حکم دیا ہے۔