واشنگٹن: (رائیٹ ناؤنیوز) امریکہ کے صدر ڈونلڈ ٹرمپ نے چین کے ساتھ معاشی مقابلے کے پیش نظر سولر اور سیمی کنڈکٹر صنعت کیلئے نئی تجارتی پالیسیاں متعارف کرادی ہیں۔ پولی سلیکون پر درآمدی شرائط اور 15 فیصد ٹیرف عائد کیا جائے گا، جو 4 دسمبر سے نافذ ہوں گے۔

پولی سلیکون، سیمی کنڈکٹر چپس اور سولر پینلز کی تیاری میں استعمال ہوتا ہے۔ اس کی زیادہ تر پیداوار چین میں ہوتی ہے۔ امریکہ طویل عرصے سے اس شعبے میں درآمدات پر انحصار کر رہا ہے۔

وائٹ ہاؤس کے مطابق ان اقدامات کا مقصد قومی صنعت کی مقامی پیداوار کو فروغ دینا ہے۔ امریکی حکومت کا کہنا ہے کہ اس سے مقامی صنعت کو عالمی مسابقت میں بہتر موقع ملے گا۔

امریکی سولر صنعت چینی کمپنیوں پر الزام لگاتی رہی ہے کہ وہ سستی مصنوعات عالمی منڈی میں فروخت کرتی ہیں۔ چین نے ان الزامات پر کوئی ردعمل ظاہر نہیں کیا ہے۔

واضح رہے کہ امریکی کانگریس نے 2022 میں ٹیکس مراعات متعارف کرائی تھیں، جس سے سولر صنعت میں سرمایہ کاری بڑھی۔ لیکن مقامی تیاریاں محدود رہیں اور کمپنیوں کو اہم مصنوعات درآمد کرنا پڑتی ہیں۔