برسلز: (رائیٹ ناوٴ نیوز) بیلجیئم کے پندرہ سالہ نوعمر سائنس دان لورنٹ سائمنز نے کوانٹم فزکس میں پی ایچ ڈی مکمل کر کے دنیا کو حیران کر دیا ہے۔ لورنٹ نے اپنی تعلیم کا آغاز آٹھ سال کی عمر میں ہائی اسکول مکمل کر کے کیا اور نو سے بارہ سال کی عمر میں یونیورسٹی آف اینٹورپ میں فزکس کی تعلیم حاصل کی۔ ان کا بیچلر پروگرام اٹھارہ مہینے میں مکمل ہوا، جب کہ ماسٹر ڈگری تیرہ سے چودہ سال کی عمر میں حاصل کی۔ نومبر 2025 میں، لورنٹ نے کوانٹم فزکس میں ڈاکٹریٹ مکمل کی۔

لورنٹ کی تحقیق ‘الیکٹران کے کوانٹم اسپن اور برقی مقناطیسی لہروں کے تعلق’ پر تھی، جسے دنیا کے صفِ اول کے سائنس دانوں نے بھی پیچیدہ سمجھا۔ اس سے قبل انہوں نے ‘بلیک ہولز اور بوسون ذرات کے درمیان مشابہت’ پر ماسٹر مقالہ لکھا۔

لورنٹ کے والدین نے ہمیشہ ان کی تعلیم کو ترجیح دی اور مالی وسائل کی کمی کے باوجود ان کی تعلیم کو یقینی بنایا۔ ان کا مقصد انٹرڈسپلنری سائنسز کو یکجا کر کے انسانی زندگی کو طول دینا ہے۔

یہ کامیابی اس بات کی مثال ہے کہ مضبوط تعلیمی ڈھانچا اور معاون نظام کتنے اہم ہیں۔ پاکستان میں تعلیمی بحران کی وجہ سے لاتعداد بچے اسکول سے باہر ہیں، جو لورنٹ جیسے مواقع سے محروم رہ جاتے ہیں۔