اسلام آباد: (رائیٹ ناؤ نیوز) پی ٹی آئی رہنما شوکت یوسفزئی نے نئے صوبوں کی تجویز کی حمایت کرتے ہوئے کہا ہے کہ یہ فیصلہ حقیقی نمائندوں کو کرنا چاہئے۔ انہوں نے تجویز دی کہ اگر پارلیمنٹ میں اتفاق نہ ہو تو ریفرنڈم کروایا جائے۔

شوکت یوسفزئی نے سماء کے پروگرام "میرے سوال” میں گفتگو کرتے ہوئے کہا کہ ترکیہ اور بھارت سمیت کئی ممالک نے صوبوں کی تعداد میں اضافہ کیا ہے۔ انہوں نے موجودہ نظام کو ناکام قرار دیتے ہوئے کہا کہ 5،5 باریاں لینے والے سسٹم کو ٹھیک نہ کر سکے۔

دوسری جانب چیئرمین پی ٹی آئی بیرسٹر گوہر نے ملک میں فوری قومی حکومت کے قیام کا مطالبہ کیا ہے۔ انہوں نے کہا کہ انتظامی یونٹس کا فیصلہ بڑے اتفاق رائے اور عوامی مینڈیٹ سے ہونا چاہیے۔

بیرسٹر گوہر نے وفاقی وزیر داخلہ محسن نقوی کے بیان پر ردعمل دیتے ہوئے کہا کہ نئے صوبے بنانے کا مینڈیٹ حکومت کے پاس نہیں ہے۔ انہوں نے کہا کہ بڑی جماعتوں کے پاس عوامی مینڈیٹ کی کمی ہے۔

واضح رہے کہ پاکستان میں صوبوں کی تعداد بڑھانے کی تجویز مختلف مواقع پر سامنے آتی رہی ہے، لیکن اس پر عمل درآمد نہیں ہوسکا۔