نئی دہلی: (رائیٹ ناؤ نیوز) بھارت میں جاری طلبہ احتجاج کے دوران معروف کھلاڑی طلبہ کے حق میں آگئے ہیں۔ سچن ٹنڈولکر، یوراج سنگھ، اور اولمپک گولڈ میڈلسٹ ابھینو بندرا نے شفاف اور میرٹ پر مبنی نظام تعلیم کا مطالبہ کیا ہے۔

ٹنڈولکر نے اپنے والد کا حوالہ دیتے ہوئے کہا ہے کہ ناکامی قابل قبول ہے مگر دھوکہ دہی نہیں۔ انہوں نے کہا کہ معاشرہ محنت کو نتائج پر ترجیح دے تو شارٹ کٹس نہ اپنائے جائیں۔

انہوں نے مزید کہا کہ بھارت کے نوجوان خوابوں سے بھرپور ہیں اور معاشرے کی ذمہ داری ہے کہ محنت کا صلہ ملے۔ بندرا نے کہا کہ تعلیم کو سیاست سے بالاتر ہونا چاہیے۔

اولمپک سلور میڈلسٹ میرابائی چانو نے بھی مظاہرین کی حمایت کی ہے اور کہا کہ دہلی میں طلبہ کا احتجاج درست ہے۔ انہوں نے افسوسناک واقعات پر تشویش کا اظہار کیا ہے۔

یاد رہے کہ سابق بھارتی کھلاڑی محمد کیف اور یوراج سنگھ نے طلبہ پر پولیس طاقت کے استعمال کی مذمت کی ہے۔ انہوں نے کہا کہ طلبہ کو محفوظ ماحول میں تعلیم کا حق حاصل ہونا چاہیے۔