اسلام آباد: (رائیٹ ناؤ نیوز) پاکستانی تاجروں نے چین کو 60 ہزار ٹن چاول برآمد کرنے کے آرڈرز حاصل کر لیے ہیں۔ چین نے پاکستانی تاجروں کی مکئی کی درآمد کیلئے رجسٹریشن بھی شروع کر دی ہے۔

رائس ایکسپورٹرز ایسوسی ایشن کے وفد کا دورہ چین کامیابی سے جاری ہے۔ وفد نے چاول کی برآمد کیلئے چین کے دو صوبوں کے ساتھ ایم او یو سائن کر لیے ہیں۔ 30 سے 40 کروڑ ڈالر مالیت کے چاول کے معاہدے متوقع ہیں۔

رائس ایکسپورٹرز ایسوسی ایشن کے چیئرمین جاوید جیلانی نے بتایا ہے کہ چین کو پاکستان سے مکئی کی برآمد بھی جلد شروع ہو جائے گی۔ چین کو باسمتی اور نان باسمتی دونوں اقسام کے چاول برآمد کیے جائیں گے۔

مالی سال کے دوران چاول کی برآمدات دوبارہ 3 ارب ڈالر کی سطح عبور کر جائیں گی۔ چین کا دورہ جاری ہے اور مزید آرڈرز ملنے کا امکان ہے۔

یاد رہے کہ چین اور پاکستان کے درمیان تجارتی تعلقات میں اضافہ ہو رہا ہے۔ چاول اور مکئی کی برآمدات معیشت میں استحکام کا باعث بن سکتی ہیں۔