کراچی: (رائیٹ ناؤ نیوز) کراچی میں کے الیکٹرک کے صنعتی صارفین کا بجلی کا استعمال ریکارڈ سطح پر پہنچ گیا ہے۔ ملک میں معاشی سرگرمیوں میں تیزی کے باعث یہ اضافہ دیکھا گیا۔

مالی سال 2026 کے دوران کے الیکٹرک کے صنعتی فیڈرز پر بجلی کی کھپت 6 ارب 8 کروڑ یونٹس تک پہنچ گئی۔ یہ کے الیکٹرک کی تاریخ میں کسی بھی مالی سال کے دوران سب سے زیادہ استعمال ہے۔

کے الیکٹرک نے کہا کہ یہ پیش رفت کراچی کی صنعتوں کو بلا تعطل بجلی کی فراہمی کے عزم کی عکاسی کرتی ہے۔ جی ڈی پی کی شرح نمو 3.7 فیصد رہی۔

کراچی کو ملک کی معاشی شہ رگ قرار دیتے ہوئے، کے الیکٹرک کے چیف ایگزیکٹو نے بجلی کے استعمال میں اضافے کو حکومت اور صنعتی برادری کی مشترکہ کاوشوں کا نتیجہ بتایا ہے۔

واضح رہے کہ 2013 سے صنعتی فیڈرز کو لوڈشیڈنگ سے مستثنیٰ رکھا گیا ہے تاکہ صنعتی پیداوار متاثر نہ ہو۔ اس پیش رفت سے ملکی معیشت کی ترقی کا سفر جاری رکھنے میں مدد ملے گی۔