واشنگٹن: (رائیٹ ناؤ نیوز) امریکی وزیر دفاع پیٹ ہیگستھ کے مطابق ایران کے ساتھ جاری جنگ پر امریکا اب تک 37.5 ارب ڈالر خرچ کر چکا ہے۔ یہ رقم گزشتہ تخمینے سے 8 ارب ڈالر زیادہ ہے، جسے سینیٹ کی اپروپری ایشنز کمیٹی میں پیش کیا گیا۔

پیٹ ہیگستھ نے کہا کہ کانگریس کو پینٹاگون کے لیے مزید 87 ارب ڈالر کی منظوری دینا ہوگی۔ ان میں 67 ارب ڈالر مشرق وسطیٰ میں فوجی کارروائیوں کے لیے مختص ہوں گے، جو موجودہ اور مستقبل کی فوجی تربیت میں مددگار ثابت ہوں گے۔

وائٹ ہاؤس نے کانگریس سے آئندہ مالی سال کے لیے پینٹاگون کے لیے 1.5 کھرب ڈالر کے بجٹ کی درخواست کی تھی، جس سے امریکی دفاعی اخراجات ریکارڈ سطح پر پہنچ جائیں گے۔ مزید فنڈز کی عدم فراہمی سے مالی خسارے کا سامنا ہوگا۔

واضح رہے کہ پیٹ ہیگستھ نے سابق صدر جو بائیڈن کی انتظامیہ کو اس صورتحال کا ذمہ دار قرار دیا ہے۔ ان کا کہنا ہے کہ سابقہ دور میں فوج کو مناسب فنڈنگ نہیں ملی، جس سے موجودہ جنگی اخراجات کی لاگت بڑھ گئی۔

کمیٹی میں ڈیموکریٹس اور ریپبلکنز کے درمیان شدید اختلافات پائے جاتے ہیں۔ ریپبلکن پارٹی کے قدامت پسند دفاعی اخراجات کے بدلے دیگر شعبوں میں کٹوتی چاہتے ہیں، جبکہ ڈیموکریٹس اضافی بجٹ کی مخالفت کر رہے ہیں۔