تہران: (رائیٹ ناؤنیوز) ایرانی سپریم لیڈر مجتبیٰ خامنہ ای نے کہا ہے کہ ایران کے ساتھ معاہدے کی بار بار خلاف ورزی سے امریکی صدر کے دستخط بے وقعت ثابت ہوئے ہیں۔

ایران کے سرکاری نشریاتی ادارے کے مطابق، مجتبیٰ خامنہ ای نے اپنے بیان میں کہا کہ امریکا کی جانب سے معاہدے کی خلاف ورزی دنیا کے سامنے اس کی بے ایمانی کو ظاہر کرتی ہے۔ ان کے مطابق یہ امریکا کے ناقابل اعتبار ہونے کا ثبوت ہے۔

سپریم لیڈر نے مزید کہا کہ امریکا کا جبر اور آمرانہ طرز عمل اس کی پالیسی کا حصہ ہے۔ انہوں نے خبردار کیا کہ امریکا کی جانب سے تنازع کو بڑھانے کی کوشش اسے مزید ذلت میں ڈال سکتی ہے۔

انہوں نے کہا کہ ایران نے امریکا کے لیے سبق تیار کر رکھے ہیں جو وہ کبھی نہیں بھول سکیں گے۔ ان کا کہنا تھا کہ قومی یکجہتی کو برقرار رکھنا ضروری ہے اور ایرانی عوام کو اپنے حکام پر بھروسہ کرنا چاہیے۔

واضح رہے کہ امریکا اور ایران کے درمیان مفاہمتی یادداشت کے حوالے سے معاہدے کی خلاف ورزیوں کی تاریخ کافی پرانی ہے۔ ایرانی حکام ہمیشہ سے اس پر اعتراض کرتے آئے ہیں۔