اسلام آباد: (رائیٹ ناؤ نیوز) وزیراعظم شہباز شریف نے پاکستان پیپلزپارٹی کو گلگت بلتستان میں حکومت بنانے کی دعوت دی ہے۔ انہوں نے کہا کہ پیپلزپارٹی گلگت بلتستان میں اکثریتی جماعت کے طور پر سامنے آئی ہے۔ مسلم لیگ ن نے پیپلزپارٹی کی حکومت سازی کی حمایت کا اعلان کیا ہے۔

وزیراعظم نے مزید کہا کہ مسلم لیگ ن نے گلگت بلتستان اسمبلی میں اپوزیشن میں بیٹھنے کا فیصلہ کیا ہے۔ ان کے منتخب اراکین پیپلزپارٹی کو حکومت بنانے کے لئے ووٹ دیں گے۔ یہ فیصلہ جمہوری روایات کے تحت کیا گیا ہے۔

انہوں نے کہا کہ مسلم لیگ ن نے ہمیشہ حلیف جماعتوں کے ساتھ عزت و احترام کا رشتہ برقرار رکھا ہے۔ دوسری جانب پیپلزپارٹی کے چیئرمین بلاول بھٹو نے وزیراعظم کے بیان کا خیرمقدم کیا ہے۔

بلاول بھٹو نے کہا کہ وزیراعظم کی جانب سے حکومت سازی کی دعوت کو قدر کی نگاہ سے دیکھتے ہیں۔ انہوں نے کہا کہ گلگت بلتستان میں پیپلزپارٹی کی اکثریت کو تسلیم کرنا جمہوری روایت کا تسلسل ہے۔

واضح رہے کہ اتفاق رائے کے نتیجے میں گورنر گلگت بلتستان اور ڈپٹی اسپیکر مسلم لیگ ن سے ہوں گے۔ پیپلزپارٹی عوام کی خدمت میں تمام صلاحیتیں بروئے کار لائے گی۔