بیجنگ: (رائیٹ ناؤ نیوز) چین میں معروف گیمنگ کمپنی یوزو گیمز کے بانی لن چی کے قتل میں ملوث ان کے کاروباری شراکت دار کو پھانسی دے دی گئی۔ عالمی خبر رساں ادارے کے مطابق، شو یاو نے 2020 میں لن چی کو زہر دے کر قتل کیا تھا۔

لن چی اور شو یاو کے درمیان اختلافات اس وقت پیدا ہوئے جب لن چی نے کمپنی کے اہم معاملات دوسرے ایگزیکٹوز کو دے دیے۔ شو یاو نے اس فیصلے پر ناراضی کا اظہار کیا، حالانکہ اس نے نیٹ فلیکس کے ساتھ معاہدے میں بھی مدد کی تھی۔

لن چی کی کمپنی کے پاس مشہور سائنس فکشن ناول ‘Remembrance of Earth’s Past’ کے فلمی حقوق تھے، جس پر مبنی سیریز ‘3 Body Problem’ عالمی شہرت حاصل کر چکی ہے۔

واضح رہے کہ شو یاو نے زہر کو پروبائیوٹک گولیوں کا روپ دے کر لن چی کو دیا تھا۔ لن چی 39 سال کی عمر میں انتقال کر گئے، اور ان کی دولت تقریباً 6.8 ارب یوان بتائی جاتی تھی۔

چینی عدالت نے اس قتل کو انتہائی گھناؤنا عمل قرار دیا، اور شو یاو کے زہر سے کئی دیگر افراد بھی متاثر ہوئے تھے۔