تہران: (رائیٹ ناؤ نیوز) ایرانی صدر مسعود پزشکیان نے امریکی حملوں کی مذمت پر پوپ لیو کا شکریہ ادا کیا ہے۔ انہوں نے پوپ کے اخلاقی، منطقی اور منصفانہ موقف کی تعریف کی۔

ایرانی صدر نے بیان میں کہا کہ پوپ لیو نے امریکی حملوں کے خلاف مضبوط موقف اپنایا۔ انہوں نے صدر ٹرمپ کے ایران کو پتھر کے دور میں بھیجنے کے بیان کو شرمناک قرار دیا۔

مسعود پزشکیان نے کہا کہ صدر ٹرمپ کا بیان غرور، دھونس اور منفی سوچ کی عکاسی کرتا ہے۔ ان کا کہنا تھا کہ امریکی اور اسرائیلی پالیسیاں ایران سمیت دنیا بھر کے لئے خطرناک ہیں۔

صدر پزشکیان نے زور دیا کہ امریکی حکومت کے غیر قانونی مطالبات کے خلاف ایران کی مزاحمت بین الاقوامی قانون اور انسانی اقدار کے تحفظ کے مترادف ہے۔

واضح رہے کہ امریکی صدر ٹرمپ کے حالیہ بیانات نے ایران اور دیگر ممالک کے درمیان کشیدگی کو بڑھاوا دیا ہے۔ ایران نے عالمی برادری سے اپیل کی ہے کہ وہ امریکی جارحانہ پالیسیوں کے خلاف مؤقف اختیار کرے۔