واشنگٹن: (رائیٹ ناؤ نیوز) امریکی صدر ڈونلڈ ٹرمپ نے کہا ہے کہ ایران کے ساتھ جنگ بندی دیگر ممالک کی درخواست پر کی گئی۔ انہوں نے خاص طور پر پاکستان کا ذکر کرتے ہوئے کہا کہ اس کی درخواست پر جنگ بندی کی گئی۔ اس کے علاوہ، ایران کی جوہری معطلی کی صورت میں امریکا ڈیل کے لیے تیار ہے۔

صدر ٹرمپ نے چین کے دورے کے بعد اپنے طیارے ایئر فورس ون میں صحافیوں سے بات کرتے ہوئے کہا کہ امریکا نے ایران کے ساتھ براہ راست اپنی ترجیح پر نہیں بلکہ دیگر ممالک کی درخواست پر جنگ بندی کی۔ انہوں نے اس اقدام کو رعایت قرار دیا۔

انہوں نے دعویٰ کیا کہ امریکا نے ایران کی عسکری صلاحیتوں کو بڑی حد تک ختم کر دیا ہے۔ انہوں نے مستقبل کے ممکنہ اقدامات کا عندیہ دیا کہ امریکا کو ایران میں دوبارہ ’کلین اپ‘ کرنا پڑ سکتا ہے۔

چین کے دورے کے دوران، صدر ٹرمپ نے بتایا کہ چین امریکا سے اربوں ڈالر کی سویابین اور 200 بوئنگ طیارے خریدنے جا رہا ہے۔ انہوں نے چینی صدر شی جن پنگ کے ساتھ تائیوان کے مسئلے پر بھی گفتگو کی۔

واضح رہے کہ چین تائیوان کو اپنا علاقہ قرار دیتا ہے اور امریکا کی جانب سے تائیوان کو ہتھیاروں کی فروخت کو اپنے اندرونی معاملات میں مداخلت قرار دیتے ہوئے مخالفت کرتا رہا ہے۔