تہران: (رائیٹ ناؤ نیوز) ایران کے وزیر خارجہ عباس عراقچی نے کہا ہے کہ اسرائیل کے ساتھ مل کر ایران کے خلاف سازش کرنے والوں کا احتساب کیا جائے گا۔ انہوں نے واضح کیا کہ ایرانی عوام کے خلاف دشمنی اختیار کرنا ایک احمقانہ جوا ہے۔

عباس عراقچی نے کہا کہ ایسے عناصر جو دشمن قوتوں کے ساتھ کھڑے ہیں انہیں اپنے اقدامات کا جواب دینا ہوگا۔ انہوں نے اسرائیل کے ساتھ گٹھ جوڑ کو ناقابل معافی عمل قرار دیا ہے۔

انہوں نے مزید کہا کہ خطے میں کشیدگی بڑھانے کی ذمہ داری ان عناصر پر ہے جو تصادم کی فضا کو ہوا دے رہے ہیں۔ ان کا کہنا تھا کہ امن کی کوششوں میں امریکہ کا دھمکی آمیز رویہ رکاوٹ ہے۔

وزیر خارجہ نے کہا کہ ایران خطے میں استحکام اور مذاکرات کا حامی ہے، تاہم قومی سلامتی پر کوئی سمجھوتہ نہیں کیا جائے گا۔ ان کا کہنا تھا کہ ایران کی خودمختاری کے خلاف کوئی بھی حرکت ناقابل قبول ہے۔

واضح رہے کہ ایران اور اسرائیل کے درمیان کشیدگی کی تاریخ طویل ہے اور یہ کشیدگی خطے میں امن کی راہ میں رکاوٹ بنی ہوئی ہے۔