لندن: (رائیٹ ناوٴ نیوز) تین سالہ امریکی بچے اولیور چو نے دنیا کی پہلی جین تھراپی کے ذریعے حیران کن صحت یابی حاصل کی ہے۔ اولیور نایاب موروثی بیماری ہنٹر سنڈروم میں مبتلا تھا جو جسم اور دماغ کو متاثر کرتی ہے۔

ہنٹر سنڈروم کے شدیدترین کیسز میں مریض عموماً 20 سال کی عمر سے قبل ہی انتقال کر جاتے ہیں۔ اولیور کے جسم میں جینیاتی نقص کی وجہ سے وہ انزائم تیار نہیں ہو رہے تھے جو خلیوں کی صحت کے لیے ضروری ہیں۔

مانچسٹر کے طبی ماہرین نے پہلی مرتبہ جین تھراپی کے ذریعے اولیور کے خلیوں میں تبدیلی کی۔ پروفیسر سائمن جونز نے کہا کہ یہ لمحہ ان کے 20 سالہ انتظار کا نتیجہ ہے۔

اولیور اس تجرباتی علاج کے لیے منتخب ہونے والے دنیا کے پانچ بچوں میں پہلے نمبر پر ہے۔ کیلیفورنیا سے تعلق رکھنے والے اولیور کی نشوونما اب تقریباً عام بچوں کی طرح ہو رہی ہے۔

طبی ماہرین کا کہنا ہے کہ اگر نتائج برقرار رہے تو یہ علاج ہنٹر سنڈروم سمیت دیگر موروثی بیماریوں کے علاج میں انقلاب لا سکتا ہے۔