تل ابیب: (رائیٹ ناوٴ نیوز) اسرائیلی فوج نے خدشہ ظاہر کیا ہے کہ ایران کی جانب سے کلسٹر وار ہیڈ میزائلوں کے استعمال نے نئی سکیورٹی چیلنجز پیدا کر دیے ہیں۔ اطلاعات کے مطابق ان میزائلوں سے جانی نقصان کا خدشہ ہے کیونکہ یہ فضا میں بلند ہو کر چھوٹے دھماکا خیز مواد بکھیرتے ہیں۔

حکام کے مطابق یہ میزائل فضا میں بلند ہونے کے بعد متعدد چھوٹے بم الگ کر دیتے ہیں جو مختلف سمتوں میں پھیل کر زمین پر گر کر دھماکے کرتے ہیں۔ ان بموں کی وجہ سے اسرائیل کے دفاعی نظام کو مشکلات کا سامنا ہے کیونکہ یہ چھوٹے سائز کے ہوتے ہیں اور ان کی رفتار تیز ہوتی ہے۔

دفاعی ماہرین کا کہنا ہے کہ ایران کی یہ حکمت عملی اسرائیل کے دفاعی نظام کو مصروف رکھنے اور مہنگے میزائل انٹرسیپٹرز کے زیادہ استعمال پر مجبور کرنے کے لیے کی گئی ہے۔ اس کے ساتھ، انسانی حقوق کی تنظیموں نے بھی ان ہتھیاروں کے استعمال پر تشویش کا اظہار کیا ہے۔

اسرائیلی فوج نے شہریوں کو ہدایت دی ہے کہ میزائل حملے کے دوران سائرن بجنے پر فوری طور پر پناہ گاہوں میں جائیں۔ مشرق وسطیٰ میں بڑھتی کشیدگی نے خطے میں سکیورٹی خدشات کو مزید بڑھا دیا ہے۔