مظفرآباد: (رائیٹ ناؤ نیوز) چیئرمین پیپلز پارٹی بلاول بھٹو زرداری نے الزام عائد کیا ہے کہ آزاد کشمیر کے الیکشن میں میرپور اور کوٹلی کے ووٹوں پر ڈاکہ مارا گیا ہے۔ ان کا کہنا ہے کہ ریاست کو فیصلہ کرنا ہوگا کہ قومی مفاد زیادہ اہم ہے یا ن لیگ کا مفاد۔

بلاول بھٹو نے مظفرآباد میں پیپلز پارٹی کے ورکرز کنونشن سے خطاب میں کہا کہ میرپور کے عوام کا شکر گزار ہوں کہ انہوں نے پیپلز پارٹی کو اکثریت دلوائی۔ لیکن لگتا ہے کہ ریاستی فیصلے ن لیگ کو ترجیح دیتے ہیں جس سے کشمیر اور پاکستان کے عوام کو نقصان ہو رہا ہے۔

انہوں نے کہا کہ ہم قومی مفاد میں ریاست پاکستان کے ساتھ کھڑے ہیں، ن لیگ کے مفاد میں نہیں۔ کشمیر کے حالات کو مقبوضہ کشمیر کی طرح نہیں بننے دیں گے۔ انٹرنیٹ کی بندش سے کشمیر مقبوضہ کشمیر لگے گا۔

بلاول بھٹو نے واضح کیا کہ 30 پولنگ اسٹیشنز پر حملے کیسے ہوئے، یہ دھاندلی کی داستان آج سے نہیں شروع ہوئی۔ ہمیں چاہیے کہ صاف و شفاف الیکشن کرائیں۔ کشمیر کاز کو بچانے کے لیے پیپلزپارٹی کی مفاہمتی پالیسی تسلیم کرنا پڑے گی۔

واضح رہے کہ سابق وزیراعظم راجہ پرویز اشرف نے بھی ن لیگ پر انتخابات میں دھاندلی کا الزام لگایا ہے۔ انہوں نے دعویٰ کیا کہ نوے فیصد ٹرن آؤٹ کیسے ممکن ہوا، جبکہ اصل میں پچیس فیصد سے زیادہ نہیں تھا۔