لندن: (رائیٹ ناوٴ نیوز) خوابوں کی دنیا عجیب و غریب مناظر سے بھری ہوتی ہے، مگر کچھ حیرت انگیز چیزیں جو ہماری روزمرہ زندگی کا حصہ ہیں، ان میں کبھی نظر نہیں آتیں۔ ماہرین کے مطابق، اسمارٹ فونز، لکھائی، خوشبو، ذائقے اور آئینے میں عکس وہ پانچ چیزیں ہیں جو خوابوں میں شاذ و نادر ہی دکھائی دیتی ہیں۔

حال ہی میں کی گئی ایک تحقیق میں 16 ہزار افراد کے خوابوں کا جائزہ لیا گیا، جس میں معلوم ہوا کہ خواتین کے خوابوں میں اسمارٹ فونز صرف 3 فیصد اور مردوں میں 2 فیصد ہی نظر آئے۔ نیند کے دوران دماغ زیادہ تر جذبات اور تعلقات پر مرتکز ہوتا ہے، جبکہ روزمرہ کی چھوٹی تفصیلات غائب ہو جاتی ہیں۔

نیند اور خواب کی محقق ڈاکٹر کیلی بولکی کہتی ہیں کہ خوابوں کی دنیا جذباتی، تخلیقی اور علامتی ہوتی ہے، جو روزمرہ کی سادہ تفصیلات سے خالی ہوتی ہے۔ آئینے میں عکس خواب میں دیکھا جا سکتا ہے، مگر وہ عموماً مبہم یا بدلا ہوا ہوتا ہے، جو خوابوں کو مزید پراسرار بنا دیتا ہے۔