اسلام آباد: (رائیٹ ناوٴ نیوز) وزیر مملکت برائے داخلہ طلال چوہدری نے بھارتی وزیر خارجہ کے مصافحے کے اخلاص کی دعا کی ہے اور کہا ہے کہ یہ منافقت والا نہ ہو۔ انہوں نے کہا کہ شہباز شریف اور سی ڈی ایف کی پارٹنر شپ نے بھارت سے جنگ جیت کر معیشت کو بہتر بنایا ہے، اور اس جوڑی کا کوئی بولر نہیں جو وکٹ لے سکے۔

طلال چوہدری نے ایک انٹرویو میں کہا کہ اس پارٹنر شپ نے سفارت کاری کو عروج پر پہنچایا ہے اور امید ہے کہ یہ جوڑی پاکستان کے لیے رنز بناتی رہے گی۔ انہوں نے کہا کہ حکومت کی انا نہیں بلکہ پاکستان کے مفادات اہم ہیں، اور بھارت کے حملے کے بعد سب کو آن بورڈ لانے کی کوشش کی گئی۔

ان کا کہنا تھا کہ بھارتی وزیر خارجہ جے شنکر نے اسپیکر سردار ایاز صادق سے ملاقات کی اور خوشگوار جملوں کا تبادلہ ہوا۔ انہوں نے یہ بھی کہا کہ بھارت کا ماضی میں مصافحہ منافقت والا رہا ہے لیکن مئی کی جنگ نے عالمی سطح پر پاکستان کی اہمیت بڑھا دی ہے۔

انہوں نے خیبرپختونخوا کے وزیر کی باتوں پر افسوس کا اظہار کیا اور کہا کہ عظمیٰ بخاری نے جواب دیا ہے، جو لوگ بات نہیں سنتے وہ سمجھتے ہیں کہ ان کی غنڈہ گردی چل گئی۔ طلال چوہدری نے کہا کہ بانی پی ٹی آئی پاکستان کے مسائل پر بات کرنے کو تیار نہیں لیکن ہم ان سے بات چیت کے لیے ہمیشہ تیار ہیں۔

نواز شریف کے بارے میں ان کا کہنا تھا کہ وہ کہیں گم نہیں ہیں، ان کی گائیڈلائنز پر حکومت کام کر رہی ہے۔