اسلام آباد: (رائیٹ ناوٴ نیوز) وفاقی وزیر دفاع خواجہ آصف نے کہا ہے کہ افغان طالبان سے زبانی یقین دہانیاں حاصل کرنے کے بجائے تحریری معاہدہ کرنا زیادہ مفید ہوگا، جو دونوں ممالک اور خطے کے استحکام کے لیے اہم ہے۔

اسلام آباد میں میڈیا سے گفتگو کرتے ہوئے خواجہ آصف نے کہا کہ پاکستان کو کابل سے مذاکرات کے لیے اقوام متحدہ یا کسی دیگر فریق کی ضرورت نہیں ہے۔ انہوں نے پائیدار امن کو پاکستان، افغانستان اور پورے خطے کی اہم ضرورت قرار دیا۔

وزیر دفاع نے کہا کہ پاکستان چاہتا ہے کہ خطے میں تجارت بڑھے، خوشحالی آئے اور تعلقات میں بہتری ہو۔ ان کا کہنا تھا کہ علاقائی استحکام ہی ترقی اور امن کی ضمانت بن سکتا ہے۔

دوسری جانب استنبول میں پاکستان اور افغان طالبان کے درمیان مذاکرات جاری ہیں، جن میں دہشت گردی کی روک تھام کے لیے قابلِ تصدیق اور مؤثر میکانزم کی تشکیل پر بات چیت ہو رہی ہے۔