پیرس: (رائیٹ ناؤ نیوز) آبنائے ہرمز میں بحری جہازوں کی آمدورفت میں کمی سے عالمی توانائی سپلائی کو خطرات لاحق ہوگئے ہیں۔ ایران اور امریکا کے مابین کشیدگی کے باعث یہ اہم بحری راستہ متاثر ہورہا ہے۔

فرانسیسی خبر رساں ادارے نے بتایا ہے کہ آبنائے ہرمز میں بحری جہازوں کی تعداد 10 روزہ اوسط سے کم ہوگئی ہے۔ گزشتہ روز صرف 4 مال بردار جہاز گزرے جبکہ ایک دن قبل یہ تعداد 9 تھی۔

بحری جہازوں کی آمدورفت میں کمی کی وجہ سے عالمی توانائی سپلائی میں رکاوٹ پیدا ہورہی ہے۔ بحرانی حالات سے قبل 125 بڑے تجارتی جہاز روزانہ اس راستے سے گزرتے تھے۔

آبنائے ہرمز عالمی توانائی کی ترسیل کے لیے اہم ترین راستہ ہے جہاں سے دنیا کا پانچواں حصہ خام تیل اور ایل این جی گزرتی ہے۔ اس ہفتے صرف 2 بڑے خام تیل بردار جہاز گزر سکے ہیں۔

یاد رہے کہ بحیرہ احمر میں باب المندب کے راستے سے بھی بحری جہازوں کی آمدورفت میں کمی واقع ہوئی ہے۔ یہ صورتحال عالمی توانائی سپلائی کے لیے مزید مشکلات پیدا کر رہی ہے۔