تل ابیب: (رائیٹ ناؤ نیوز) اسرائیل نے ایران کو خبردار کیا ہے کہ تہران کے جوہری یا بیلسٹک میزائل پروگرام کی بحالی پر حملہ ہوگا۔ اسرائیلی وزیر ایلی کوہن نے کہا ہے کہ ایران و امریکا کے درمیان معاہدہ ہونے کے باوجود بھی اسرائیل کارروائی کرے گا۔

الجزیرہ کے مطابق، ایلی کوہن نے اسرائیلی ویب سائٹ کو انٹرویو دیتے ہوئے کہا کہ ایران کی بحالی کوششوں کو اسرائیل برداشت نہیں کرے گا۔ انہوں نے واضح کیا کہ جوہری یا میزائل پروگرام کی تعمیر نو پر اسرائیل کا ردعمل سخت ہوگا۔

ایلی کوہن کے مطابق، اسرائیل نے ایران پر حملہ نہ کیا ہوتا تو ایران جوہری ہتھیار کے قریب ہوتا۔ اسرائیلی انٹیلی جنس کے جائزے میں حملوں سے ایران کا پروگرام دو سے چار سال پیچھے گیا ہے۔

اسرائیلی وزیر نے کہا کہ اسرائیل اپنی فوجی صلاحیت ثابت کرچکا ہے اور دوبارہ پروگرام کی کوشش پر کارروائی کے لئے تیار ہے۔ اسرائیل کی نظر میں ایران کا پروگرام قومی سلامتی کے لئے خطرہ ہے۔

یاد رہے کہ ایران کے جوہری پروگرام اور امریکا کے ساتھ ممکنہ معاہدے پر خطے میں کشیدگی برقرار ہے۔ اسرائیل کا بیان ان کشیدگیوں کے دوران آیا ہے جس سے خطے میں صورتحال مزید حساس ہوسکتی ہے۔