اسلام آباد: (رائیٹ ناؤ نیوز) سابق وزیر اعظم عمران خان کی بہن عظمیٰ خان نے ان کی اسپتال منتقلی کے سلسلے میں توہین عدالت کی درخواست دوبارہ دائر کردی ہے۔ یہ درخواست اعتراضات دور کرنے کے بعد سپریم کورٹ میں جمع کرائی گئی۔

درخواست میں وزیراعظم شہباز شریف، وزیر قانون اعظم نذیر تارڑ اور وزیر اطلاعات عطا تارڑ کو فریق بنایا گیا ہے۔ اس میں عمران خان کو شفا اسپتال منتقل کرنے اور ان کے میڈیکل ٹیسٹ کرانے کا مطالبہ کیا گیا ہے۔

سپریم کورٹ رجسٹرار آفس نے پہلے اعتراضات کی بنیاد پر یہ درخواست واپس کر دی تھی۔ اعتراض یہ تھا کہ توہین کے مرتکب افراد کو الزامات کی فہرست نہیں بھیجی گئی تھی۔

چئیرمین پی ٹی آئی بیرسٹر گوہر نے کہا کہ رجسٹرار سپریم کورٹ سے ملاقات ہوئی اور اعتراضات دور کیے گئے ہیں۔ اب درخواست کو نمبر الاٹ کر دیا گیا ہے۔

واضح رہے کہ ڈاکٹر عظمیٰ خان نے درخواست کی جلد سماعت کے لئے بھی اپیل دائر کی ہے، جس میں سپریم کورٹ سے درخواست کو فوری سماعت کے لئے مقرر کرنے کی استدعا کی گئی ہے۔