تہران: (رائیٹ ناؤ نیوز) ایرانی پارلیمنٹ کی قومی سلامتی کمیٹی کے سربراہ ابراہیم عزیزی نے کہا ہے کہ ایران کے خلاف مجوزہ زمینی کارروائی کی سازش کو ابتدا میں ہی ناکام بنا دیا گیا۔

ابراہیم عزیزی نے بتایا کہ ایرانی فوجی یونٹس نے مقامی فورسز کی مدد سے مختلف سمتوں سے ہونے والے زمینی حملے کو ناکام بنایا۔

انہوں نے مزید کہا کہ حالیہ جنگ میں امریکا ایران کے خلاف اپنے مقاصد حاصل کرنے میں ناکام رہا اور اگر دوبارہ ایران کی سلامتی کو خطرہ لاحق ہوا تو ایران امریکی اہداف کو نشانہ بنائے گا۔

عزیزی نے کہا کہ امریکا کو اس وقت تک معاف نہیں کیا جائے گا جب تک اسے مکمل شکست نہیں ہوتی، ایران امریکا کی مکمل شکست تک پیچھا کرتا رہے گا۔

یاد رہے کہ ایران اور امریکا کے درمیان کشیدگی میں حالیہ برسوں میں اضافہ ہوا ہے، جس کی وجہ سے خطے کی صورتحال مزید پیچیدہ ہو چکی ہے۔