پاکستانی بھائیوں کی تخلیق کردہ دنیا کا پہلا کمپیوٹر وائرس ‘برین’، کمپیوٹر سیکیورٹی میں اہم موڑ ثابت۔ وائرس کا مقصد میڈیکل سافٹ ویئر کی غیر قانونی کاپی روکنا تھا۔
لاہور: (رائیٹ ناؤ نیوز) دنیا کا پہلا کمپیوٹر وائرس دو پاکستانی بھائیوں نے تیار کیا تھا۔ یہ وائرس ‘برین’ کہلاتا ہے اور جنوری 1986 میں لاہور میں تخلیق کیا گیا۔
باسط فاروق علوی اور امجد فاروق علوی نے اس وائرس کو اپنے میڈیکل سافٹ ویئر کی غیر قانونی کاپی کو روکنے کے لیے بنایا۔ یہ وائرس دفاعی نوعیت کا تھا اور 5.25 انچ فلاپی ڈسک کے ذریعے پھیلتا تھا۔
وائرس میں بھائیوں کی دکان کا ایڈریس اور فون نمبر ایک پوشیدہ پیغام کی صورت میں شامل تھا۔ یہ وائرس کمپیوٹر کے ڈیٹا کو نقصان نہیں پہنچاتا تھا۔
یہ وائرس بین الاقوامی سطح پر ٹیکنالوجی کے ماہرین کے لیے ایک اہم موضوع بن گیا۔ یہ کمپیوٹر سیکیورٹی کی تاریخ میں ایک نیا باب تھا۔
یاد رہے کہ کمپیوٹر وائرس اکثر معروف ٹیک کمپنیوں اور قومی سلامتی کے لیے خطرہ بن جاتے ہیں۔ ‘برین’ وائرس کی تخلیق پاکستانیوں کی تکنیکی صلاحیتوں کی عکاسی کرتی ہے۔
