صوابی: (رائیٹ ناؤ نیوز) صوابی میں تمباکو کے کاشتکاروں نے کم نرخوں پر خریداری کے خلاف احتجاج کرتے ہوئے تمباکو نذر آتش کر دیا۔ کاشتکاروں نے صوابی پریس کلب کے سامنے احتجاج کیا، جہاں ایک کاشتکار نے 500 کلوگرام تمباکو جلا دیا۔

کاشتکاروں کا کہنا ہے کہ پاکستان ٹوبیکو بورڈ نے تمباکو کی قیمت 740 روپے فی کلو مقرر کی ہے، مگر کمپنیاں صرف 300 سے 350 روپے دے رہی ہیں۔ ان کا کہنا ہے کہ 30 ہزار خاندانوں کا روزگار تمباکو سے وابستہ ہے۔

کاشتکاروں نے حکومت سے مطالبہ کیا ہے کہ تمباکو کی خریداری مقررہ نرخ پر کی جائے۔ انہوں نے خبردار کیا کہ اگر مطالبات تسلیم نہ ہوئے تو احتجاج کا دائرہ بڑھایا جائے گا۔

واضح رہے کہ مالی سال 2025-26 میں تمباکو سے حکومت نے 329 ارب روپے ٹیکس وصول کیا، جبکہ مجموعی ٹیکس وصولی 357 ارب روپے رہی۔

یاد رہے کہ کاشتکاروں نے حکومت اور متعلقہ حکام سے مناسب معاوضے کی فراہمی کا مطالبہ کیا ہے، بصورت دیگر احتجاج بڑھانے کا ارادہ ظاہر کیا ہے۔