مظفرآباد: (رائیٹ ناؤ نیوز) آئی جی آزاد جموں و کشمیر کیپٹن (ر) لیاقت علی ملک نے کالعدم ایکشن کمیٹی کے ناپاک عزائم کا پردہ چاک کردیا ہے۔ انہوں نے یوم شہدائے پولیس کی تقریب میں بتایا کہ تنظیم کے کارندوں نے عاقب شہید کے اہل خانہ کو اغواء کیا۔

آئی جی نے کہا کہ تنظیم کی جانب سے شہید عاقب کے والد کو اذیت دی گئی۔ انہوں نے مزید بتایا کہ تنظیم نے شہید کی لاش کو چار دن تک روکے رکھا اور غیر اخلاقی ویڈیوز بنائیں۔

آئی جی نے سوال اٹھایا کہ سینہ چاک کرکے زندہ جلانے والے ظالم ہیں یا ملک کی حفاظت کرنے والے؟ ان کا کہنا تھا کہ پولیس پر حملے کرنے والے مظلوم نہیں ہوسکتے۔

انہوں نے کالعدم تنظیم کی جانب سے ریاست مخالف پروپیگنڈا کی مذموم سازش کو ناکام ہونے کا دعویٰ کیا۔ ان کے مطابق اس پروپیگنڈا کا مقصد آزاد کشمیر میں انتشار پھیلانا تھا۔

یاد رہے کہ کالعدم ایکشن کمیٹی کی ماضی میں بھی ریاست مخالف سرگرمیوں کی تاریخ رہی ہے۔ اس گروپ پر مختلف الزامات کی بنیاد پر پابندی عائد کی گئی تھی۔