ممبئی میں سلمان خان کی رہائشگاہ کے باہر تعینات پولیس اہلکار دل کا دورہ پڑنے سے چل بسا۔ مزید سیکورٹی اقدامات کیے جا رہے ہیں۔
ممبئی: (رائیٹ ناؤ نیوز) ممبئی پولیس کا ایک اہلکار سلمان خان کی رہائشگاہ کے باہر دل کا دورہ پڑنے سے انتقال کر گیا ہے۔ اہلکار کانسٹیبل گنیش رائٹے کی ڈیوٹی سلمان خان کے گیلیکسی اپارٹمنٹس کے باہر تھی جہاں جمعے کی شام یہ حادثہ پیش آیا۔
پولیس کے مطابق گنیش رائٹے نے شام 6 بجے طبیعت کی خرابی کی شکایت کی جس کے بعد اسے فوراً اسپتال منتقل کیا گیا۔ اسپتال پہنچنے پر ڈاکٹروں نے اسے مردہ قرار دے دیا۔ اہلکار کی لاش کو پوسٹ مارٹم کے لئے بھیج دیا گیا ہے تاکہ موت کی اصل وجہ معلوم کی جا سکے۔
یہ واقعہ سلمان خان کی سکیورٹی کے اضافی انتظامات کے دوران پیش آیا ہے۔ پولیس حکام نے خدشہ ظاہر کیا ہے کہ موت ڈیوٹی کے دوران پیش آنے والے دل کے دورے کے باعث ہوئی۔
واضح رہے کہ سلمان خان کے دوست بابا صدیق کے قتل کے بعد ان کی سکیورٹی کو ‘وائی پلس’ (Y-plus) کیٹیگری میں اپ گریڈ کر دیا گیا تھا۔ یہ اقدام سلمان کو لارنس بشنوئی گینگ کی جانب سے ملنے والی دھمکیوں کے بعد کیا گیا۔
یاد رہے کہ 2024 میں بابا صدیق کے قتل سے قبل سلمان خان کی رہائشگاہ کے باہر فائرنگ کا واقعہ بھی پیش آیا تھا جس میں دو افراد نے موٹر سائیکل پر آ کر کئی راؤنڈ فائر کیے تھے۔
