لاہور: (رائیٹ ناؤ نیوز) لاہور ہائیکورٹ نے ایل پی جی کمپنیوں کی اضافی پریمیم وصولی فوری طور پر روک دی ہے۔ عدالت نے اوگرا اور تمام لائسنس ہولڈر کمپنیوں سے جواب طلب کر لیا ہے۔

ایل پی جی کی اضافی پریمیم وصولی کے معاملے پر اوگرا اور متعلقہ کمپنیوں کو نوٹس جاری کیا گیا ہے۔ جسٹس مرزا وقاص رؤف نے لاہور ہائیکورٹ بار کے وکیل بابر مرتضیٰ خان کی درخواست پر سماعت کی۔

40 سے زائد کمپنیوں کے خلاف درخواست گزار بابر مرتضیٰ نے دلائل دیے ہیں۔ وکیل درخواست گزار نے کہا کہ ایل پی جی کمپنیاں غیر قانونی اضافی پریمیم وصول کر رہی ہیں جو قانون کے خلاف ہے۔

عدالت نے ریمارکس دیے کہ گیس عام آدمی کے استعمال کی چیز ہے، اضافی پریمیم وصولی سے شہری مہنگی گیس خریدنے پر مجبور ہیں۔ عدالت نے کمپنیوں کو رحم و کرم پر چھوڑنے سے انکار کیا۔

واضح رہے کہ اضافی پریمیم وصولی کے معاملے پر مختلف کمپنیوں کے خلاف شکایات درج کی جا چکی ہیں۔ عدالت نے اس ضمن میں فوری کارروائی کا حکم دیا ہے۔