اسلام آباد: (رائیٹ ناؤ نیوز) مشیر وزیراعظم رانا ثنااللہ نے کہا ہے کہ وفاقی وزیر داخلہ محسن نقوی اور چیئرمین تحریک انصاف بیرسٹر گوہر کا رابطہ ایک مثبت پیشرفت ہے۔ ان کا کہنا تھا کہ علی امین گنڈاپور کا بھی وزیرداخلہ سے رابطہ رہا ہے اور ہم نے ہمیشہ اس کی تعریف کی ہے۔

رانا ثنااللہ نے پروگرام ‘ندیم ملک لائیو’ میں گفتگو کرتے ہوئے کہا کہ سیاستدانوں کو ایک ساتھ بیٹھ کر مکالمہ کرنا چاہیے۔ ماضی میں میثاق جمہوریت کے وقت تیسری قوت آگئی تھی، جو آج تک سنبھالی نہیں جا سکی۔

رانا ثنااللہ نے بانی پی ٹی آئی کے حوالے سے کہا کہ سپریم کورٹ کا فیصلہ سیاسی نہیں تھا۔ بانی پی ٹی آئی کو شفا اسپتال لانے پر امن وامان کا خدشہ تھا، اس لئے پمز میں چیک اپ کی تجویز دی گئی۔

لیگی رہنما نے کہا کہ حکومتی موقف درست ہے کہ قیدی کا سرکاری اسپتال سے باہر علاج ممکن نہیں۔ وزیراعظم توہین عدالت کے معاملے میں شامل نہیں ہیں اور درخواست میں محسن نقوی کا نام نہیں ہے۔

واضح رہے کہ ڈی جی آئی ایس پی آر نے 9 مئی کے حملے کو فوج پر بغاوت قرار دیا تھا اور کہا تھا کہ کسی کو معاف نہیں کیا جائے گا۔ پمز اسپتال کا واقعہ افسوسناک ہے اور اس کی انکوائری ہونی چاہیے۔ وزیراعظم نے اعلیٰ سطحی اجلاس میں واقعے کا جائزہ لیا ہے۔