ڈھاکا: (رائیٹ ناؤ نیوز) بنگلادیشی فوجی افسر کو شیخ حسینہ کے دور حکومت میں ایک سیاست دان کے مبینہ ماورائے عدالت قتل کے الزام میں حراست میں لے لیا گیا ہے۔

یہ واقعہ 2018 میں حسینہ واجد حکومت کی انسداد منشیات مہم کے دوران پیش آیا، جس میں سیکڑوں اموات ہوئیں۔ کئی ہلاکتوں کو سکیورٹی فورسز کے مبینہ جعلی مقابلوں کا نتیجہ کہا گیا۔

بنگلادیشی کرائم ٹربیونل نے کاکس بازار کے کونسلر اکرم الحاق کے قتل کے کیس میں 11 حکام کے خلاف درخواست منظور کی۔ ان میں سابق وزیراعظم شیخ حسینہ اور کئی پولیس و فوجی افسر شامل ہیں۔

مقامی میڈیا نے رپورٹ کیا کہ بریگیڈیئر جنرل مفتاح الدین احمد کو بنگلادیشی فوج نے حراست میں لیا ہے۔ ان کی گرفتاری کی تصدیق فوج کے شعبہ تعلقات عامہ نے کی ہے۔

یاد رہے کہ ان کی گرفتاری کو شیخ حسینہ کے دور حکومت کی اہم ترین قانونی کارروائیوں میں شمار کیا جا رہا ہے، جو حکومت کے اقدامات کے خلاف ٹربیونل کی کوششوں کا حصہ ہے۔